رتو رت نیں اکھاں روئیاں
ویکھو کیہ انہونیاں ہوئیاں
موئیاں مریاں نپ کے دھریاں
دیوتیاں دیاں جادوگریاں
منتر پڑھدیاں اُٹھ کھلوئیاں
پاک پوِتر نھاتے دھوتے
خون خرابے جاگ کھلوتے
سُفنے ہوئیاں پیار پریتاں
پُھنڈے گئے دربار مسیتاں
شرماں گئیاں لیہہ گئے جھاکے
قبراں تے وی بمب دھماکے
لج حیا دی لتھی لوئی
رہی مقدس تھاں نہ کوئی
موت کھلوتی پہرہ دیوے
جیون دے دروازیاں اُتے
کیہنے منتر پُھوک چلائے
چلن بمب جنازیاں اُتے
ایڈے شیر دلیر بہادر
مویاں دا نئیں کردے آدر
بساں اُتوں لاہ مسافر
چُن چُن مارن مومن کافر
لکھ ہزارے چُن چُن مارے
جُوہاں چھڈ چھڈ گئے وچارے
کیہڑیاں پاک اصولاں اُتے
چلن بمب سکولاں اُتے
کُولے کُولے بال نمانے
پُھلاں ورگے لال نمانے
خونم خون تے بوٹی بوٹی
کیہنوں کرن سوال نمانے
کیویں جھولیاں خالی ہوئیاں
ماواں کُھونجیں لگ لگ روئیاں
چڑھی ہنیر دی رنگن گُوڑھی
گھر گھر سوگ تے گھر گھر پُھوڑھی
رتو رت نیں اکھاں روئیاں
ویکھو کیہ انہونیاں ہوئیاں
صفدر ڈوگر
No comments:
Post a Comment
Note: only a member of this blog may post a comment.