جنت دوزخ (پہاڑی پوٹھوہاری)
سِدھا سادا اک کشمیری
مَری تے سِدھا جنت پونچیا
اللہ میاں کی او آخے
تساں نی جنت اتنی سوہنی
چشمے، باغ، پہاڑ تے برفاں
ہر پاسے اے سوہنیاں حُوراں
جیہڑا دِکھناں، دِکھناں اے رہناں
کھادے آ، پیتے آ سب کی لبھناں
اللہ میاں گل تے بُجھا
تساں نی جنت اتنی سوہنی
اِتھے قبضہ کوئی نئیں کرناں؟
اتھے فوجاں کوئی نی چاڑھناں؟
اے نا وے میں اتھے وی اک کوٹھا چاڑاں
تے دوزخے چوں اک شوں شوں کرنا گولا اچھے
ماڑا سب کی اُڈری گچھے
لیکن اتھے ہک فائدہ وا
دوزخ ہکے پاسے ای
متھے اُپر تیر لگے تے
کنڈ فر وی بچی نی رہسی
لیکن جتھے میں رہناں سیس
اوس جنت نے آسے پاسے سارے دوزخی
ساڑے سینے، ساڑیاں کنڈاں
ساڑیاں اکھیں، ساڑے بازو
سب کی دوزخیاں ساڑی شوڑیا
اللہ میاں گل تے بُجھا
کون و مکاں نے مالک دس
پر نِکی جئی اک عرض وی مہاڑی
جے اگلی واری
دنیا اُپر جنت بنا
دوزخ ہِکے پاسے رکھیاں
راز احتشام
No comments:
Post a Comment
Note: only a member of this blog may post a comment.