اڑیا تینوں کی لگدا اے
مینوں چھڈ کے خوش رہ لئیں گا
تُوں تے کہندا ہندا سی؛
میں تینوں کیویں چھڈ سکدا واں
توں تے کسے پناہ ورگی ایں
جنت جاندے راہ ورگی ایں
سونے ورگے اکھر سارے
اکھ دے موتی کر دِتے نیں
چپ دا روزہ توڑیں جے توں
میں وی دل دی گل سناواں
جو طے کیتی بیٹھا اے توں
عقلاں والی گل نئیں کوئی
ایہہ مسلے دا حل نئیں کوئی
ویکھ حقیقت آل دوالے
سُکھاں دے مُل تول ریا ایں
سوچ دے گنجل دکھ دے جالے
چھڈنا ای تے گل مُکا لے
رکھنا ای تے روک لے سجناں
میں نئیں مڑ کے واپس آنا
ہو سکدا اے میرے باہجوں
پُھلاں ورگا رج کے سوہنا
ساتھی ہور وی مل جائے تینوں
ساتھ تے پیار دے فرق نوں سمجھیں
بے قدرا جے ہار گئیوں تے
میرے جذبے مار گئیوں تے
میرا آکھیا چیتے رکھیں
دُوجی واری یار نئیں ملدا
وِچھڑے ساتھی مل جاندے نیں
دُوجی واری پیار نئیں ملدا
سوچ سمجھ کے پائیں وچھوڑا
تیرے ہتھ وچ ڈور اے سجناں
توڑ دے پاویں جوڑ وے سجناں
سوچ دے گنجل کد کھولیں گا
میں ناں ہوئی تد کھولیں گا
ماوٰی سلطان
No comments:
Post a Comment
Note: only a member of this blog may post a comment.