اٹھ اتاں نوں جٹا​ مردا کیوں جائیں

 اُٹھ اُتاں نوں جٹّا​

مردا کیوں جائیں​

بھولیا! تُوں جگ دا ان داتا​

تیری باندی دھرتی ماتا​

تُوں جگ دا پالنہار​

تے مردا کیوں جائیں

​

اٹھ اُتاں نوں جٹّا​

مردا کیوں جائیں​

​

جرنل، کرنل، صوبیدار​

ڈپٹی، ڈی سی، تھانیدار​

سارے تیرا دِتّا کھاون​

تُوں جے نہ بِیجیں

تُوں جے نہ گاہویں​

بھُکھّے، بھانے سب مر جاون​

ایہہ چاکر، تُوں سرکار​

مردا کیوں جائیں​

اٹھ اُتاں نوں جٹّا​

مردا کیوں جائیں​

​

وچ کچہری، چونکی تھانے​

کیہہ اَن بھول تے کیہہ سیانے​

کیہہ اشراف تے کیہہ نمانے​

سارے کھجّل خوار​

مردا کیوں جائیں​

اٹھ اُتاں نوں جٹّا​

​

ایکا کر لئو، ہو جاؤ کٹھّے​

بھُل جاؤ رانگڑ، چیمے، چٹھے​

سبھے دا اِک پریوار​

مردا کیوں جائیں​

​

جے چڑھ آون فوجاں والے​

توں وی چھویاں لمب کرا لے​

تیرا حق، تِری تلوار​

تے مردا کیوں جائیں​

دے اللہ ہُو دی مار​

تے مردا کیوں جائیں​

فیض احمد فیض