سوچ سمجھ کے ٹھان کے لمی
کئی ورھیاں توں تان کے لمی
جِسراں لوکیں سُتے ہوئے نیں
دھوناں سُٹ کے جُتے ہوئے نیں
ساوے پیلے بگیاں وانگوں
اِنج لگدا اے ڈھگیاں وانگوں
جوون والا کئی نسلاں نوں
کوہلو اگے جو سکدا اے
ایتھے کُجھ وی ہو سکدا اے
پِنڈ وکاؤ، شہر وکاؤ
ہر کوئی اٹھے پہر وکاؤ
سستی اے اج یاری اینی
ودھ گئی بے اتباری اینی
اَیویں نِکی موٹی گل وچ
کوئی خبر نہیں کہڑے پل وچ
ساڈے نال کھلوتا ہویا
کِدھرے ہور کھلو سکدا اے
ایتھے کُجھ وی ہو سکدا اے
راتاں دے نیں دِن وچ ڈیرے
انھیاں دی اے بھیڑ چوفیرے
عقلاں نیں گھاہ چریاں ہوئیاں
سوچاں اندروں مریاں ہوئیاں
سچ تے سچ دی ریت وی کوئی نہیں
اُتوں پُچھ پرتیت وی کوئی نہیں
اُولا پَیلا جیہڑا چاہوے
اوہیو ای اَک چو سکدا اے
ایتھے کُجھ وی ہو سکتا
ارشاد سندھو
No comments:
Post a Comment
Note: only a member of this blog may post a comment.