بُڈھی دی دعا
زور شباباں ویلے جنی میں اتھری ساں
میرے سر دا صاحب سی
اُس توں وی کجھ اگے
جس وی ہک دے زور توں
دھرتی وی کنبدی سی
پر اوہ کرماں بھرماں والا
اے گلوں سی ڈاہڈا درد ارانے اڑیا
اوہدا دن تے بھُوڑی وچ
جیئوں تیوں لنگھ جاندا
پر اوہدی ہر رات نتھانویں
اوہدیاں بُکاں ورگیاں اکھیاں وچ
دُھمدی سی
گھر آؤندا تے بس اوہنوں جنج
سپ سُنگھ جاندا
وِرلا ائی اوہ، ہوٹھاں چوں
کوئی بول الاندا
ساڈی جھول وی رب سچے نے
بھروتی پر
اوہدی اوہ بے نانویں چپ
نہ مگروں لتھی
اوہدے بال نے وی جد اس توں
اوہدی چپ نوں کھوجنا کیتا
اوہ چپ رہیا
فر اوہ بال وڈیرا ہویا
تے اوہ وی باپو دے وانگر
چپ دے جال چ پھسدا گیا
ایتھوں تیک جے اک دن اوہنے
ڈانگ ہُلاء کے
اپنے کامے پیو دے ویہڑیوں
لنگھدا رستہ
زور دھنگانی لنگھدا رستہ بند کر دتا
اس رستے وچ کندھ پا دتی
پیو دی بُلھیوں
اوہدی ورہیاں بدھی وَیری چپ لاہ دتی
پر ایس گھول چ
ساڈیاں اکھیاں دا چانن وی جاندا رہیا
گل مقدمیاں تیکن اپڑی
ساڈیاں ہکاں سُنجیاں ہویاں
پر وڈکے
تے اوہدے پُت دے پُت دا متھا
سارے پنڈ چ
اج وی لشکاں لاٹاں مارے
میں سوچاں جے سوہنیا ربّا
تُوں سانوں بھاں توں
ایس توں ودھ وی دُکھ دے دے
پر ساڈے ایس پُت دے پُت نوں
پیو دے دِتّے جذبے نال
سنگھاری رکھیں
ساڈے گھر چوں لنگھدی راہ وچ
اُسری کندھ اُساری رکھیں
کیوں جے گھر دی آزادی دا
ایس جگ اندر سانواں کوئی نئیں
دھرتی تے درگاہوں لتھی
ایس نعمت دا نانواں کوئی نئیں
ماجد صدیقی
No comments:
Post a Comment
Note: only a member of this blog may post a comment.