مونجھ ہے درد ہن جگارے ہن
تیڈے احسان ڈھیر سارے ہن
ہنڑ کیوں روندیں اے پہلے سوچیں ہا
عشق وچ تاں فقط خسارے ہن
کیوں آکھاں جو کلھا تھی گیا ہاں
تیڈیں یادیں دے بہوں سہارے ہن
وقت ہووی تاں آ کراہیں مل ونج
ڈاڈھے اوکھے ساڈے گزارے ہن
شوق ساکوں وی ہا شہادت دا
اوں وی اکھ نال تیر مارے ہن
کہیں دیاں مونجھاں خدا پناہ ڈیوے
اساں ڈینہہ دے وی ڈٹھے تارے ہن
ماںڑ کیڑھا بیگانیں چیزیں تے
ساہ امانت جو ہن ادھارے ہن
ہنجھ دی صورت غزل دے چولے وچ
درد کیا کیا نہ روپ دھارے ہن
فیض ہر سوچ تئیں تے مک گئی اے
میڈے سب شعر تیڈے بارے ہن
فیض بلوچ
No comments:
Post a Comment
Note: only a member of this blog may post a comment.