ٹُر کے سجناں سنگ پنجابی رہتل دے
چاڑھ لے توں وی رنگ پنجابی رہتل دے
کُھسّہ، لاچا، کُرتا پگ تے پُھلکاری
ون سونّے انگ پنجابی رہتل دے
جاگ پیا اے راکھا اپنی رہتل دا
جاگ پئے نیں ڈنگ پنجابی رہتل دے
گھول کبڈی بھنگڑا لُڈی صوفی رنگ
دل موہ لیندے ڈھنگ پنجابی رہتل دے
اِک مُٹیار دی وِینی دے وچ ہسدی ہوئی
دیوے نظارے ونگ پنجابی رہتل دے
گہنیاں وانگوں سانبھے ہوئے نیں صدیاں توں
میرے جھنگ نیں رنگ پنجابی رہتل دے
کیہ مجال کسے وی جگ دی رہتل دی
اگے جاوے کھنگ پنجابی رہتل دے
لہندے چڑھدے اج وی ایہدیاں دُھماں نیں
گھیرے ہوئے نہیں تنگ پنجابی رہتل دے
میرے دیس دے انکھی نالے جیداراں
جھنڈے دِتے ٹنگ پنجابی رہتل دے
جے تُوں چاہویں جنت ویکھاں دنیا تے
رب توں جلوے منگ پنجابی رہتل دے
سُن لے سد علی احمد گجراتی دا
ہس کے ویڑھے لنگھ پنجابی رہتل دے
علی احمد گجراتی
No comments:
Post a Comment
Note: only a member of this blog may post a comment.