رب آ وڑدا میری جُوہ
اوہ کھیڈے لُکن میٹی
مارے ادھی راتیں سیٹی
میری ہک وِچ وجے گیٹی
لیندا چُپ چپیتے چھوہ
رب آ وڑدا میری جُوہ
میرا کردا رنگ گلابی
میرے دوویں نین مہتابی
میتھوں منگدا گل جوابی
میں ڈِگاں ڈُونگھے کھوہ
رب آ وڑدا میری جُوہ
نی مُکھ میرے نوں ڈوبے
نہ پیراں ہیٹھاں کھوبے
بھاگی کردا میں جئے ٹوبے
میں بیٹھاں بیڑی نُوح
رب آ وڑدا میری جُوہ
مُڑ لتھ جاندا اے پانی
فیر چھیڑے نویں کہانی
دُکھ وسدا، باقی فانی
میرا راضی کردا رُوح
رب آ وڑدا میری جُوہ
شکیلہ جبیں
No comments:
Post a Comment
Note: only a member of this blog may post a comment.