آ فر چھوٹی عمر دی اج ایہہ گل دہرائیے
چل سکولے چلیے دوویں
کچی دا چل قاعدہ پڑھیے
کسے دے کولوں گاچی لے کے
تختی دھو کے دھپے دھر کے
ماسٹر کولوں قلم گھڑائیے
آ فر چھوٹی عمر دی اج ایہہ گل دہرائیے
جدوں سکولوں چھٹی ہووے
پنڈوں باہر مکئی دی بنی
اتے چادر سٹ کے بہیے
اک دوجے نال گلاں کریے
اک دوجے دے درد ونڈائیے
آ فر چھوٹی عمر دی اج ایہہ گل دہرائیے
کچا ویہڑا لبھیے کدھروں
جس دی چپہ چپہ بھبھل
ہتھاں دے نال دور ہٹا کے
شاہ شٹاپو کھیڈن دے لئی
گاٹی دے نال خانے واہیے
آ فر چھوٹی عمر دی اج ایہہ گل دہرائیے
اج دے دن نوں عید سمجھ کے
سوہنے دھوتے کپڑے پا کے
بوہڑ دے وڈے ڈاہن دے اتے
سن دا موٹا رسا پا کے
واری واری پینگھ چڑھائیے
آ فر چھوٹی عمر دی اج ایہہ گل دہرائیے
No comments:
Post a Comment
Note: only a member of this blog may post a comment.