میں ساندل دھرتی دا پتر میرا مان پنجابی اے

 میں ساندل دھرتی دا پُتر میرا مان پنجابی اے

میں پنج پانیاں دے نال گُجھا میری پچھان پنجابی اے

لِکھاں پنجابی، بولاں، نالے سوچاں وچ پنجابی دے

میرا ہر ویلے دا مِترا! پڑھن پڑھان پنجابی اے

میرے لُوں لُوں دے وچ رَچیا اے ناں دیس پنجاب دا رنگ

میں پنجاب دا جمیا جایا، دِین ایمان پنجابی اے

لسّی، مکھن، پیڑے، ساگ سرہوں دا روٹی مَکی دی

میرا پِین پنجابی اے تے میرا کھان پنجابی اے

جُگنی، ڈھولے، ٹپّے، ماہیے، کِکلی، سَمی، جُھمر وی

گِدا، لُڈی، بھنگڑا میرا نچّن گان پنجابی اے

جے سِکھیا واں سِکھنا چاہنا ایں پڑھ لے فیر پنجابی توں

سمجھن تے سمجھاون لئی بڑی اسان پنجابی اے

عزمی ایس پنجاب نے مینوں جیون جوگا کیتا اے

ماں بولی اے میریاں ساہواں میری جان پنجابی اے

منصور عزمی