لُٹ لٹا کے خلقت ربدی
حصے آؤندی کھا کے سبھدی
خون رِسدے لاشے چھڈ کے
حق ہمسایہ پنڈوں کڈھ کے
آؤندا جاندا ھار پوانا اِیں
ہر مہینے جو عمرے جانا اِیں
عمرہ نال لیاؤندا کیوں نئیں
پچھلا سبق بھلاؤندا کیوں نئیں
مُکدی گل مکاؤندا کیوں نئیں
کر لے جو جو کرنی اُو
جو کرنی اوہ بھرنی اُو
بُکھے تے بیمار تے ویکھ
لِسّے رشتے دار تے ویکھ
ہر گلی ہر نُکرے نیں
کی تیریاں اکھاں کُکرے نیں
دلدی کھوٹ کڈھاؤندا کیوں نئیں
عملاں تے شرماؤندا کیوں نئیں
عمرہ نال لیاؤندا کیوں نئیں
اک نئیں سو سو کر
عمرے پاک ہوہو کر
جے نئیں دھن خوراکاں پاک
سر تا پا پوشاکاں پاک
منڈا منڈا پاؤن جانا اِیں
ایویں ہڈ بھناؤن جانا اِیں
سدھے پاسے آؤندا کیوں نئیں
کیتی گل ویاؤندا کیوں نئیں
عمرہ نال لیاؤندا کیوں نئیں
اپنی سوچ نوں دم کرا
پہلاں من کے مکے جا
اللہ پاک رسولﷺ وی اک مک
سچے سب اصول وی اک مک
کیہڑا شک مٹاؤن جانا اِیں
کہنوں اڈ کراؤن جانا اِیں
رُسیا رب مناؤندا کیوں نئیں
سُتے بھاگ جگاؤندا کیوں نئیں
عمرہ نا لیاؤندا کیوں نئیں
بابا اسحاق سہوتہ
No comments:
Post a Comment
Note: only a member of this blog may post a comment.