دوروں دوروں تکیا مینوں یاراں نیں
یاراں وِچ نہیں گنیا مینوں یاراں نیں
ویری اوتھے مَنتاں منن آندے نیں
جہڑی تھاں تے دبیا مینوں یارا نیں
سورج میری جھولی دے وِچ بیٹھا سی
راتاں اندر لبھیا مینوں یاراں نیں
دنیا میرے ناں دے نعرے لاندی اے
پر اج تیک نہیں منیا مینوں یارا نیں
نہ ای کنڈے لگیا نہ ہی ڈُبیا مَیں
ادھ وچکارے رکھیا مینوں یاراں نیں
ایہو شرط سی اُچی کندھ اُسارن دی
نینہہ دے اندر گڈیا مینوں یارا نیں
جے میں بُوٹا ہوندا ظفری سُک جاندا
جِنی واری وڈھیا مینوں یاراں نیں
ظفر اعوان
No comments:
Post a Comment
Note: only a member of this blog may post a comment.