ہک دُوجے نوں وڈھ وڈھ کھائی جاندے نیں
جِندڑی دی ہر لیک مٹائی جاندے نیں
مُورکھتا دی کُتی ات پئی جمدی اے
انھی کٹک کُتیک ودھائی جاندے نیں
بھن تروڑ دے ڈھیکے کر کر خرمستی
اُمت دی تاں کھیہہ اُڈائی جاندے نیں
ہتیارے تے پھل وکیل چڑھاؤندے نیں
سچ انصاف دی ڈھیری ڈھاہی جاندے نیں
اُتوں کھرا حشر دا کڈھدے دِسدے نیں
ہیٹھ برود سرنگ وچھائی جاندے نیں
دُشمن آپنی رت دے، ویری دھرتی دے
آپنی کھیڈ نوں آپ ونجائی جاندے نیں
ایہناں توں اسلام دی گُڈی نہیں اُڈنی
ایویں وعظ دی ڈور گھسائی جاندے نیں
مسعود منور
No comments:
Post a Comment
Note: only a member of this blog may post a comment.