اج تے سرکارﷺ دا جشن میلاد اے
سوہنے منٹھار دا سارے ذکر کرو اَج تے سرکارﷺ دا جشنِ میلاد اے
نغمے صلِ علیٰ دے سارے پڑھو اج تے سرکارﷺ دا جشنِ میلاد اے
نوری نوری سماں ویکھ لو چار سو
وَسدی رب دی رحمت پئی کو بُکو
در کُھلا جے اپنے دامن بھرو اَج تے سرکارﷺ دا جشنِ میلاد اے
بُلبلاں قمریاں رنگ نکھارن پیاں
نام سوہنے دا موہنوں پکارن پیاں
ڈبدیو نام سوہنے دا لے کے ترو اَج تے سرکارﷺ دا جشنِ میلاد اے
موتی انوار دے جگ تے وسدے پئے
غمزدہ عاصی چن چن کے ہسدے پئے
جھولی پھیلا کے بیٹھو شیشہ گرو اَج تے سرکارﷺ دا جشنِ میلاد اے
رب دے فرمان تے مُک ہنیرے گئے
اوہدے نور تھیں چمک سویرے گئے
حکم ہویا آتش کدو ہن ٹھرو اَج تے سرکارﷺ دا جشنِ میلاد اے
بولو اَج بے زبانوں حکم تھیں میرے
سُتے بھاگ نظامی جاگے تیرے
اڈو نال خشی دے اَج بے پرو اَج تے سرکارﷺ دا جشنِ میلاد اے
عبدالحمید نظامی
No comments:
Post a Comment
Note: only a member of this blog may post a comment.