راہ ہموار وی ہو سکدی اے
روح سرشار وی ہو سکدی اے
وچھڑن والے مسئلے اُتے
سوچ وچار وی ہو سکدی اے
مینوں تیرے نال محبت
دوجی وار وی ہو سکدی اے
ہور کسے سرکار دے قبضے
وچ سرکار وی ہو سکدی اے
سدھی سادی لگن والی
پر اسرار وی ہو سکدی اے
حسرت دا عتبار نئ ہندا
وسوں بار وی ہو سکدی اے
نہ ہویا کر اکھ توں اوہلے
اکھ بیکار وی ہو سکدی اے
مل کے بشریٰ نال محبت
خود مختار وی ہو سکدی اے
بشریٰ ناز
No comments:
Post a Comment
Note: only a member of this blog may post a comment.