دل روندا تے کُرلاندا اے
کِتے دور سمندروں پار کوئی
جدوں گیت ہجر دے چھوہندا اے
دل روندا اے
دل روندا تے کُرلاندا اے
سُکھ نفل نمازاں منتاں سو
تیرے مِلن نوں ہاڑے پاندا اے
کدی ساون مینہ دی جھڑیاں چے
ہجراں دیاں لمیاں گھڑیاں چے
کسی یاد دی بُکل مار کوئی
دُکھی دل دے چِھیڑ کے تار کوئی
جدوں کُھوہ نیناں دے جوہندا اے
دل روندا اے
دل روندا تے کُرلاندا اے
جیویں ہِجر دے رنگلے چرخے تے
کوئی لمیاں تنداں پاندا اے
جدوں وِچھڑی کونج قطاراں توں
وکھ ہو کے گوڑیاں یاراں توں
بِن ڈار کِتے کُرلاندی اے
جند ڈکو ڈولے کھاندی اے
کوئی کلاہ کارا ہِجراں چے
بہہ ہِجر دا مارا ہِجراں چے
جدوں پِیڑاں ہار پروندا اے
دل روندا اے
دل روندا تے کُرلاندا اے
فِر عشق دی دُھخدی دھونی چے
کوئی مچدے بھانبھڑ لاندا اے
کِتے دور سمندروں پار کوئی
جدوں گیت ہِجر دے گاندا اے
دل روندا اے
دل روندا تے کُرلاندا اے
نالے گیت ہِجر دے گاندا اے
ابرار ندیم
No comments:
Post a Comment
Note: only a member of this blog may post a comment.