لوکی آندے جاندے رہندن
تیرے مُلاں جیون شالا
فتوے دیندے ای سوہنے لگدن
سَچیوں جیہڑے بھُکھے ہوندن
وڈے پاپ اینہاں تے تَھپ کے
رج کے روٹیاں کھاون والے
چُھٹے ڈُھکے ہو جاندے ہن
تاہیوں سانوں پانی بوڑے
تاہیوں سانوں چھَلّاں وڈھن
اچیاں کوٹھیاں دے کجھ واسی
رب دے خاص الخاص نیں بندے
کاہتوں اونہاں نوں کائی آفت
بھورا آن کے نقص وی لاوے
وگدی وہندی اوہ پئی جاوے
ربّا اج ہک گل میں پُچھناں
اج تائیں سانوں دسیا ای نئیں توں
کھوٹھیاں، کاراں، بنگلے ہوون
فیر تاں کجھ نئیں کہندا توں نا
سُتیاں تے ناں پانی چھڈنا ایں
نا توں بھکھے بال مریندا ایں
سُنیاں اے عزت، شہرت دینا ایں
نویں نویں رنگ روپ ویکھینا ایں
دھرتی دس خاں کاہدی بُھکھ ایئی
جنگی تیرے کول طیارے
فوجی تیرے شیر جوان
تیرے واسی مَردے پئے ہن
مُردے پانی تردے پئے ہن
تیرے توں جے بچ نئیں سکدے
کاہدی تیری چودھر رہسی
کیہڑی تیری عزت بچسی
سینے چیرن لگ پئی ایں توں
تیرے تے کہئیں وِسنا نئیں
ٹاواں ٹاواں بندا لبھسی
اَکھّاں اگے دُھوڑ دے بدل
ویکھ ویکھ پچھتائیں گی
تینوں کجھ وی دِسنا نئیں
تینوں کجھ وی دَسنا نئیں
سہیل مظہر
No comments:
Post a Comment
Note: only a member of this blog may post a comment.