اگے وجی کندھ تے نئیں نا
رب دا بوہا بند تے نئیں نا
عشق دا دھاگہ ہوندا کچہ
ایہہ کوئی ریشم تندتے نئیں نا
اج تک سجنا تینوں دس میں
ماریا کھٹا دند تے نئیں نا
تُمے وانگر کوڑا جیون
ایہہ مشری گل قند تے نئیں نا
چند وی تیرے ولے تکّے
تیرا مُکھڑا چند تے نئیں نا
جہڑا ادب دی گل نئیں کردا
ہوندا دانش مند تے نئیں نا
اوہدے دے بوہے تیکر ارشد
ایڈا سوکھا پندھ تے نئیں نا
ارشد منظور
No comments:
Post a Comment
Note: only a member of this blog may post a comment.