کوئی نئیں یاد اساکوں
ساڈے جمنڑ ویلے
کیا کہیں چھج پتاسے ونڈے
کیا کہیں آن اذاناں ڈتیاں
یہ کوئی ڈوماں ڈھول وجایا
یہ کوئی کھسرے ویل اگاڑی
کوئی نئیں یاد اساکوں
کیہڑی کھیڈ کھڈاونڑا ویکھیا
کیہڑا سنگتی یار بنڑایا
کہیں کہیں ساکوں ہنج روایا
کہیں کہیں ساڈے ہنجوں پوجھے
کہیں دےرل پتھاری کھادا
کہیں دے قرض لہاونڑ کیتے
اساں سر تغاری چاتی
کہیں دے مال دے پٹھے کیتے
کہیں دے باجرے راکھی بیٹھے
کہیں دے گھر دا پہرہ ڈتا
کوئی نئیں یاد اساکوں
کے تائیں ونج کپاہیں چنڑیاں
کے تائیں ونج پنیریاں پٹیاں
کے تائیں ونج کے منجیاں لائیاں
کے تائیں کنڑکاں گاہیاں
کے کجھ ساکوں اجرت ملی
کوئی نئیں یاد اساکوں
کیویں ساڈیاں گنڈھیں پیاں
کہیں کہیں ونج کے سڈے دتے
کتھاں اساں کھارے چڑھیے
کتھاں ڈھولی ڈھول وجایا
کتھوں جنجاں چڑھیاں
کوئی نئیں یاد اساکوں
کے تائیں نین نروے رہے ہائیں
کڈن بیمار تھیوسے
کڈن کہیں کوئی پھکی ڈتی
کڈن جھوک لڈیوسے
ونج قبر لتھیوسے
مدثر بھارا
No comments:
Post a Comment
Note: only a member of this blog may post a comment.