پل ڈو پل دے میلے وچ
سال گزردے رہ ویندن
ول اوں وہندے ویلھے وچ
خیال گزردے رہ ویندن
بندے نال زمانیں دے
کال گزردے رہ ویندن
رانجھا ہیر اچ گم تھی گئے
مال گزردے رہ ویندن
کل تاں بے کل رہ ویندے
حال گزردے رہ ویندن
رستے بھانویں نہ ہوون
بال گزردے رہ ویندن
او گزرے تاں کئی محشر
نال گزردے رہ ویندن
دل دے شاہد شیشے تیں
وال گزردے رہ ویندن
عزیز شاہد
No comments:
Post a Comment
Note: only a member of this blog may post a comment.