انکھی پُت پنجاب دے
اسیں باغی ہر قانون دے
اسیں مندے اِکو پیار
سانوں رُوپ کچہری پُجدی
سانوں مُنصف پُجدا یار
اسیں باغی ہر قانون دے
اسیں سُولی اُتے نچدے
ساڈی مقتل وچ دھمال
ساتھوں موت ولا کے لنگھدی
اسیں ہونی دیندے ٹال
اسیں سُولی اُتے نچدے
اسیں سُورج دھونوں پھڑلیا
اسیں تارے دِتے نتھ
ساڈے پیر ہوا دی کنڈ تے
ساڈے انبروں اگے ہتھ
اسیں سورج دھونوں پھڑ لیا
اسیں چیتر قیدی کر لیا
اسیں پوہ نوں دِتا ساڑ
ساڈی اکھ وچ ساون وسدا
ساڈے دِل دے اندر ہاڑ
اسیں چیتر قیدی کر لیا
اسیں ٹھیک نشانے لاوندے
ساڈے سِدھے جاون تیر
اسیں ٹوٹے کیتے چن دے
اسیں بدل دِتے چیر
اسیں ٹھیک نشانے لاوندے
اسیں دیوے بالے رت دے
اسیں جُسے لائی اگ
اسیں آپ انھیرا پھکیا
اسیں روشن کیتا جگ
اسیں دیوے بالے رت دے
اسیں انکھی پُت پنجاب دے
ساڈے جمدے پُتر شیر
سانوں ویری گِدڑ لگدے
سانوں کوئی نئیں سکدا گھیر
اسیں انکھی پُت پنجاب دے
اسیں یار نوں کعبہ مندے
ساڈے دِل دے وچ مسیت
سانوں جِدھر سجن دِسیا
اسیں اودھر دِتی نیت
اسیں یار نوں کعبہ مندے
ارشاد سندھو
No comments:
Post a Comment
Note: only a member of this blog may post a comment.