متراں نوں ماں بولی دیہاڑ دی بدہائی
تیری ماں بولی ہے بیبا ککھاں وانگ نہ رول پنجابی
پڑھ پنجابی لکھ پنجابی، غیرت مندا بول پنجابی
اپنی ماں بولی نوں چھڈکے کاہنوں در در رلدے پھریئے
ساڈی جند تے جان پنجابی ساڈے دل دے کول پنجابی
چڑھدے توں لیہندے تیکر تے پورب توں پچھم تیکر
گول اے ساری دنیا اس وچ لاوے چکر گول پنجابی
ابلکیش، خیام تے حافظ، غالب، میر، اقبال تے حالی
بلھا، وارث، باہو، جم کے کھولھے سبھ دے پول پنجابی
اکو چاء اے مردے دم تیکر میں ایہدی سیوا کرساں
ایہہ اے سمی میرے لئیں تے میں ہاں ایہدا ڈھول پنجابی
اپنی اپنی بولی دے وچ ساری دنیا پئی کرلاوے
جو کجھ مرضی بولن سارے سبھ توں بھارا بول پنجابی
غیراں بولیاں بولن نال جنید اکرم جو گنجھل پے گئے
بول کے اپنی ماں دی بولی دتے سارے کھولھ پنجابی
جنید اکرم
No comments:
Post a Comment
Note: only a member of this blog may post a comment.