پھل پھلا دا فیدہ کو نہیں
جھوٹھے چاء دا فیدہ کو نہیں
ویلے سِر جو ڈکی رہندی
اوس بلا دا فیدہ کو نہیں
عشق دے ڈنگ زہریلے اُتے
کسے دوا دا فیدہ کو نہیں
راہ دے اگلے پاسے منزل
پئے کراہ دا فیدہ کو نہیں
دل چوں ٹُر جو عرش نہ ملّے
اوس دعا دا فیدہ کو نہیں
جس دا ہتھ نہ کنڈ تے ہووے
اوس بھرا دا فیدہ کو نہیں
عشق دا سیک ہنڈھا توں قیصر
سِلھے ساہ دا فیدہ کو نہیں
قیصر محمود گورائیہ
No comments:
Post a Comment
Note: only a member of this blog may post a comment.