سن جوگی راہواں بھلیا مڑ گھر نوں پھیرا پا

ہاڑا​

جوگن​

سُن جوگیا راہواں بھُلیا، مڑ گھر نوں پھیرا پا​

تیری جوگن پئی اڈیکدی، تکدی پئی سُنجے راہ​

میں کُٹھی کرد پریم دی، میرا سنگھی دے وچ ساہ​

نہ مردی نہ میں جیوندی، گئی لمّی عمر وہا​

میں تتڑی تاڑ تریہہ دی، جیوں مچھی بِن دریا​

ساہ ساہ وچ بھانبڑ مچدے، میرے لوں لوں لگی بھا

​ہَڈ بالن کیتے ہجر نے، اتے جثہ وانگ سواہ​

وے جے سندا ایں کوکاں میریاں، کوئی اُتّر چا پرتا​

کوئی گھل سنیہا سکھ دا، کوئی پریم دا راگ سنا​

میں راہیں جند وِچھا دیاں، کراں تیری آدربھا​

سُن جوگیا راہواں بھلیا، مڑ گھر نوں پھیرا پا​

جوگی​

پیراں وچ دھرتی کنبدی، مینوں انج نہ واجاں مار​

اک تیر کلیجے ماریا، تیری ڈونگھی اکھ دی دھار​

نی میں لمی واٹیں تر پیا، کچھ منزل سُدھ نہ سار​

کتھے لبھاں اپنے آپ نوں، میں دتا جگت وسار​

یعقوب آسی