سجناں تے متراں نوں پنجاب دا ثقافتی دیہاڑ مبارک
جیہڑا رنگ پتاسے دا
اوہو تیرے ہاسے دا
توں ایں ہیرا لکھاں دا
توں ایں سونا پاسے دا
روپ دا چسکا بھر دیویں
رکھیں مان جے کاسے دا
پورا تینوں پڑھنا اے
پڑھنا کیہ خلاصے دا
چشمہ تیرے جوبن دا
جیون یار پیاسے دا
سوہنا ایں توں اندر تیک
سوہنا پاسے آسے دا
دسّاں تیرے لارے دا
جُھوٹے جہے دلاسے دا
ذکر سی تیرے کجل دا
کوڑے سک دنداسے دا
وصل تیرا ہی دارُو اے
تیرے ایس اُداسے دا
ستلج راوی سُکے نیں
نقشہ گُم بیاسے دا
جیون ڈنگا رہناں اے
میرے جہے اکواسے دا
عشق نے جثہ چٹ لیا
شاعر اچھے خاصے دا
ستیا ناس کراں ہجرا
تیرے ستیا ناسے دا
سجن باجھوں یار صفی
تولے دا نہ ماسے دا
سرفراز انور صفی
#Punjabi_Culture_Day
No comments:
Post a Comment
Note: only a member of this blog may post a comment.