پچھدے رہن دن رین دو نین راہی کتھوں اوہدے دیدار نوں راه جاندی
تاجدار سرکار دا تخت کتھے کہڑی شاہی دربار نوں راه جاندی
چھان ماریا فرش زمین سارا چکر چڑھے ہوئے چرخ برین پھر پھر
دیر و حرم خاموش نے کون دسے کتھوں یار دے پیار نوں راه جاندی
قابو قفس وچ، قفس صیاد دے ہتھ کدی قیدیاں نوں وطن بھلدے نہیں
بے قرار بلبل پھڑپھڑا کے تے واجاں مارے بہار نوں راه جاندی
پار پار پکارناں مثل طوطی ایہہ دلیل اے پار ناں پہنچنے دی
اسی راہ وی خود تے پار وی خود ہور کوئی نہیں پار نوں راه جاندی
جتھے یار دسے اوہا حج کعبہ سوہنی چھال چنہاں وچ مار دس گئی
گلی یار دی بھال کے پچھیا ناں کہڑی بلخ بخار نوں راه جاندی
مکے وچ مقید نہ سمجھ زاہد اوس مطلق شہباز دے راز نیارے
آنت الحق پھسا لیو منبراں تے انا الحق تھیں دار نوں راه جاندی
کر لے میریا لقماناں علاج میرا بانہہ تے ہتھ دھر کے اندروں ویکھ دھڑکن
اتر اکھیوں سینیوں پار اگے دل بے قرار نوں راه جاندی
سروں عقل سٹ پیر جنون دے چم پی ظلمات تھیں آب حیات شیشے
دائم لٹکدی زلف سیاہ وچوں سدھی صاف رخسار نوں راه جاندی
دائم اقبال دائم
No comments:
Post a Comment
Note: only a member of this blog may post a comment.