مشرق دا ان داتا
مشرق دا ان داتا
دان کریندا
بُکھیاں ننگیاں دے کم آندا
نیلیاں اکھیں دیاں جھیلاں وچ
گوڑھے پیار دیاں لہراں
ٹھاٹھاں مارن
مِٹھڑے بول الیندا
ہولے گالھ کریندا
رنگاں تے خوشبواں والا
مشرق دا ان داتا
مشرق دا ان داتا
بختاں والا
وِیلا مول نہ باہوے
جیڑھی جا، تے سوچ نہ پجے
اوں جا پھیرا پاوے
چن تے پیر ٹکاوے
ذرے دی چھاتی کوں چیرے
اوہ طاقت کڈھ آوے
جیڑھی جنگل بیلے ساڑے
وسدے رسدے شہر اجاڑے
عرش تے فرش کنباوے
طاقت والا، حشمت والا، مشرق دا ان داتا
سارے رُعب وڈائیاں تیڈیاں
ساڈے گھر وچ شاہیاں تیڈیاں
مفلر تے نکٹائیاں تیڈیاں
ساڈے گل وچ پھائیاں تیڈیاں
ساڈا سب کجھ صدقے تیڈے
ساڈے تیل دے چشمے تیڈے
ہک تاں ڈس اے کرماں والا
رکھ رکھا تے شرماں والا
اے کہیں قوم دے خون دی سرخی
شام کوں ڈینہ لہنڑ توں پہلے
جم و یندی ہے اسماناں تے
تیڈے کوڑے پیار دی چھاں تے
سامنڑے کھڑ کے یار مرانویں
چِیکاں سنڑ کے کِھلدار ہویں
تیڈا انت کہیں نہ پاتا
مشرق دا ان داتا
حسن رضا گردیزی
No comments:
Post a Comment
Note: only a member of this blog may post a comment.