چاچا جی
کن کھول کے سن لو
ڈیرے توں ہُن
میں اک رُکھ وی
وڈھن کوئی نہیں دینا
ایہ رکھ میرے تہاڈے کوئی نہیں
ایہ رُکھ اُتے وسن والے پکھواں دے نیں
رُکھ وڈیچے
تاں پکھواں نے اُجڑ جانایں
آپو وی میں
کئی واری تاں گھر بنایا
وس نہیں سکیا
لحظہ لحظہ
اپنی رُوح تے جُسے اُتے
اُجاڑ ہنڈایا
باپُو دسدا
ایداں ای اک واری ساڈا
پورا پنڈ اُجڑیا
بوڑھ پٹیجے آلھنے ڈگے
پنچھی موئے
بوڑھ، پلدیاں
بوڑھاں اُتے آلھنے پیندیاں
صدیاں لگن
چاچا جی
کن کھول کے سن لئو
میں ڈیرے توں، اک وی رُکھ نہیں وڈھن دینا
کوئی آلھنا ڈِگن نہیں دینا
کوئی پنچھی مرن نہیں دینا
نواں اُجاڑا پین نہیں دینا
وسیم گردیزی
No comments:
Post a Comment
Note: only a member of this blog may post a comment.