جندڑی نمانڑی نوں انج وی نہ رول وے
پیار والا بول کدی ساڈے نال بول وے
تھکے ساڈے ہتھ تیرا بُوہا کھڑکا کے
کاگ وی نی بولدے بنیرے اُتے آ کے
سُک گئیاں اکھیاں، ہنجو نہ پھرول وے
پیار والا بول کدی ساڈے نال بول وے
ہوکیاں دا سیک دیواں دل مجبور نوں
ہور کیہڑی اگ لاواں تیرے میں غرور نوں
بے پرواہیاں والی تکڑی نہ تول وے
پیار والا بول کدی ساڈے نال بول وے
دِتیاں دُہائیاں چناں مُڑ کے تے آویں ہا
ساہ مُک جاندے ساڈے، فیر چھڈ جاویں ہا
پھٹ نئیوں سُکے ہالے پٹیاں نہ کھول وے
پیار والا بول کدی ساڈے نال بول وے
وسدے جہان وچ لگدا نہ جی وے
دور ہو کے تیتھوں ساڈا دنیا تے کی وے
ہور کی خزانہ تیرے جھلیاں دے کول وے
پیار والا بول کدی ساڈے نال بول وے
جندڑی نمانڑی نوں انج وی نہ رول وے
پیار والا بول کدے ساڈے نال بول وے
مقداد احسن
No comments:
Post a Comment
Note: only a member of this blog may post a comment.