کُل جگ دے پنجابیاں نوں وساکھی دیاں ودھائیاں
ساڈا ایٹمی چکی دا آٹا
نی سیئو
ساڈا ایٹمی چکی دا آٹا
چار چوفیرے کنکاں ای کنکاں
فیر وی کھائیے گھاٹا
نی سیئو
ساڈا ایٹمی چکی دا آٹا
ایس چکی دے اندر پِس گئے
کیہ پنجاب کیہ فاٹا
نی سیئو
ساڈا ایٹمی چکی دا آٹا
گھوڑا تیز آبادی والا
ہتھ مزدور دے چھاٹا
نی سیئو
ساڈا ایٹمی چکی دا آٹا
ایس آٹے نُوں لبھدے لبھدے
کئیاں دا سِر پاٹا
نی سیئو
ساڈا ایٹمی چکی دا آٹا
دیس میرے دی قسمت اُتے
مار گیا کوئی کاٹا
نی سیئو
ساڈا ایٹمی چکی دا آٹا
سر چکراوے یار حکیما
کناں وِچ سناٹا
نی سیئو
ساڈا ایٹمی چکی دا آٹا
حکیم احمد نعیم ارشد
No comments:
Post a Comment
Note: only a member of this blog may post a comment.