اوہدی اکھ دے وار دی زد وچ
میں آں اک تلوار دی زد وچ
ریتا دا بنھ ثابت ہویاں
یاراں دے اک وار دی زد وچ
سورج اپنے راہ تے ہویا
چھڈ سایہ دیوار دی زد وچ
طوفاناں نال لڑ جاندا، پر
میں آیاں پتوار دی زد وچ
توبہ، نک دا ناز نہورا
دل ہے تکھی دھار دی زد وچ
لوکو میرا بچنا مشکل
میں آیاں واں پیار دی زد وچ
لگدائے تیر نشانے لگنا
دل ہے اکھ دے وار دی زد وچ
عشق پہاڑ دا کی کرنا ایں
دل ہے بھارے بھار دی زد وچ
ربا خیر گزاریں دل دی
گلشن فیر بہار دی زد وچ
طارق گجر
No comments:
Post a Comment
Note: only a member of this blog may post a comment.