منصف
گل سُن وے انھیا سُورجا
تری تکڑی دے وچ جھول
ترے ہتھ وچ بے انصافیاں
ترے پلڑے گٸے نیں ڈول
گل سُن وے انھیا سُورجا
گل سُن وے انھیا سُورجا
تُوں کِیتا ملک تباہ
تری اکھ دی پٹی کالڑی
کُجھ ہو گٸی ہور سیاہ
گل سُن وے انھیا سُورجا
گل سُن وے انھیا سُورجا
تری ضد نے دتا ساڑ
تری بد عنوانی سوچ نے
جنتا وچ پایا پاڑ
گل سُن وے انھیا سُورجا
گل سُن وے انھیا سورجا
اج جگ تے پے گٸی شام
ترے کِیتے ہوٸے انیاٸے نے
تینُوں کیتا اے بدنام
گل سُن وے انھیا سورجا
گل سُن وے انھیا سُورجا
مُکھ تیرا لوبھ سمان
تینُوں گھیریا کالے بدلاں
ترا ہِردا اے شمشان
گل سُن وے انھیا سُورجا
گل سُن وے انھیا سُورجا
اج کھیڑیاں دے ہتھ ڈور
اج قیدو مُنصف شہر دے
تے ونجھلی لے گٸے چور
گل سُن وے انھیا سُورجا
یونس متین
No comments:
Post a Comment
Note: only a member of this blog may post a comment.