میں نچدی کدوں ساں نچائی گئی آں
میں عزت کسے دی لٹائی گئی آں
ایہہ کس نے وسائے ایہہ کیوں کوٹھے وسے
ایہہ عورت کیوں روئی، ایہہ کیوں مرد ہسے
دسو ایہہ کس نے جنازے خریدے
کس نے آخر کفن کھسے
مرداں دی گردن ہے کیوں اج نیویں
کوئی گردن اٹھائے کوئی آ کے تے دسے
توں گھر نوں اجاڑیں تے کوٹھے تے آویں
میں کوٹھے تے رہندی کہ کوٹھا تے وسے
میں اجڑاں اجاڑاں گئی ایسی ہاں اجڑی
کہ اجڑ اجڑ کے وسائی گئی آں
میں نچدی کدوں ساں نچائی گئی آں
میں عزت کسے دی لٹائی گئی آں
امین ملک
No comments:
Post a Comment
Note: only a member of this blog may post a comment.