اتھے تاں میری کوئی نی سندا
میری غریبی نوں کوئی نی پندا
تُو میرا رازق ہیں شکوہ کرساں
تُو رزق ونڈسیں میں جھولی بھرساں
تُو ونڈ برابر دی کیتی کوئی نی
میں اوہ زمین ہاں جو پیتی کوئی نی
میں کم وی سینے دی ٹڈ تے کیتن
میں زخم کھادن تے لب چا سیتن
میں خود زمیناں تے ہل وگائے
تے کئیاں قسماں دے بیج پائے
اساں محل وی بنا کے ہٹے
اساں پہاڑاں دے سینے پٹے
جو میرے ہتھاں دا کھٹیا کھاندن
نماز پڑدن تے حج تے جاندن
غریب گھاٹے دی لین وچ ہن
تے اج وی آٹے دی لین وچ ہن
رزق مالک تو پورا گھلدائیں
امیر بندیا تُو سارا ملدائیں
تُو اپنے حصے دا کھا کے سوندائیں
امیر بندیا ودھا کے سوندائیں
تُو ونڈ برابر دی کردا کیوں نہوں
جھولی حصے دی بھردا کیوں نہوں
تُو کردا کھٹ ایں تے بھردا ڈھیر ایں
میں کردا ڈھیر ہاں تے بھردا گھٹ ہاں
ہر دا اپنا جے حصہ ہوندا
غریب لین اچ نا اج کھلوندا
عمار کھا کے نے رکھے ستے
او میرے بال اج وی بھکے ستے
عمار بھٹہ
No comments:
Post a Comment
Note: only a member of this blog may post a comment.