پنجابی پوٹھواری پوٹھوہاری پہاڑی شاعری
بسنت
موسم بدلیا، بھینسو چُہلی
چِیتر چڑہیا، سریوں پُھلی
ساویاں کنڑکاں بہار بنائی
سردی کَہٹی رُت گئی کُھلی
کُڑیاں چُڑیاں پہینگاں چُجنڑ
جاتک پاتک گُڈیاں ڈارنڑ
نیلے چوہچ سمانے اُپر
بلبل طوطے ڈاریاں مارنڑ
چِلماں، حُقے گُڑ گُڑ بولنڑ
مائیاں باوے دُکھ سُکھ پھولنڑ
چار چُہفیرے جاتک، کُڑیاں
خوشیاں نیاں پنڈاں کھولنڑ
ڈنگر مال چرانڑے آلے
پٹھا دتھا چانڑے آلے
پردیساں وچ جانڑے آلے
جہینڑے رہن کمانڑے آل
کُنڑ تواڑے درد ونڈاسی
کُنڑ تواڑے پہار ہنڑ چاسی
کملیا کیڑے پاسے جاسیں
مَری گئیاں نی ما تے ماسی
عمران راجہ
No comments:
Post a Comment
Note: only a member of this blog may post a comment.