پنجابی پوٹھواری پوٹھوہاری پہاڑی شاعری
جگ دا میلہ کی یاد کرنا
ملیاں صورتاں نہ کوئی میل دئیاں
خوشیاں ملیاں تے گھڑی پل ہوون
جیویں پتراں تے بونداں تریل دئیاں
اک گھڑی بہار مناونے نوں
کلیاں کھلیاں چنمبے رویل دئیاں
میلہ ختم ہویا میل وچھڑ گیا
ملیاں کوٹھیاں ہجر دے جیل دئیاں
سدا نہ بلسن دیوے حیاتیاں دے
جدوں رئیاں نہ طاقتاں تیل دئیاں
اک دن ڈولی وچ سوار ہوسن
کڑیاں گڈیاں نال ہو کھیل دئیاں
طرف عدم ول جاندیا ساربانا
پکیاں پکڑیاں مہاراں نکیل دئیاں
اس ول ولیاں نوں پا دتے
پٹھیاں چالاں نے ظالم چڑیل دئیاں
ہوسی کون اوتھے غم خوار ساڈا
لیسی خبراں جو ویلے کویل دئیاں
اکبر ٹکٹ نہ جنہاں دے کول ہوسن
او پچھتاوسن سواریاں ریل دئیاں
راجہ سید اکبر
No comments:
Post a Comment
Note: only a member of this blog may post a comment.