جدید پنجابی شاعری
تیرا پِنڈ
اج اس پنڈ دے میں کولوں لنگھ چلیاں
جتھوں کدے ہلنے توں دل نہیں سی کردا
جتھے مینوں نت پیا رہندا کوئی کم سی
کم کی سی، سچی گل اے جتھے تیرا دم سی
تیرے دم نال پنڈ حج والی تھاں سی
کِڈا سوہنا ناں سی
اوہدا ناں سُن کے تے جان پے جاندی سی
دید اوہدی اکھیاں نوں ٹھنڈ اپڑاندی سی
دوروں رُکھ تک کے تھکیویں لہہ جاندے سن
باہیں مار مار کے اوہ انج پئے بلاندے سن
سرگ دا سواد آوے اوہناں ہیٹھ کھلیاں
اج میرے پیراں نوں نہ کھچ کوئی ہوندی اے
پنڈ ولوں آئی وا پنڈے نوں نہ پونہدی اے
کسے دیاں چاواں میرا راہ نہیں ڈکیا
کوٹھے اُتے چڑھ کے تے کسے نہیں تکیا
کِکراں دے اولھے ہو کے سبھ توں اکلیاں
اج اِنجھ پنڈ دے میں کولوں لنگھ چلیاں
جیویں کوئی کسے گورستان کولوں لنگھدا
شریف کنجاہی
No comments:
Post a Comment
Note: only a member of this blog may post a comment.