کلاسیکی پنجابی شاعری
حجاب کریں درویشی کولوں کد تک حکم چلاویں گا
گل الفی سر پا برہنہ، بھلکے روپ وٹاویں گا
اس لالچ نفسانی کولوں اوڑک مون مناویں گا
گھاٹ زکوٰۃ منگن گے پیادے، کہہ کیہہ عمل دکھاویں گا
آن بنی جد سرپربھاری، اگوں کیہہ بتلاویں گا
حجاب کریں درویشی کولوں، کد تک حکم چلاویں گا
حق پرایا جا تو ناہیں، کھا کربھار اٹھاویں گا
پھیرنہ آ کر بدلہ دیسیں لاکھی کھیت لٹاویں گا
داء لا کے وچ جگ دے جوئے جتے دم ہراویں گا
حجاب کریں درویشی کولوں کد تک حکم چلاویں گا
جیسی کرنی ویسی بھرنی پریم نگر ورتارا ہے
ایتھے دوزخ کٹ توں دلبر اگے گل بہارا ہے
کیسر بیج جو کیسر جمے، لہسن بیج کیہہ کھاویں گا
حجاب کریں درویشی کولوں کد تک حکم چلاویں گا
کرو کمائی میرے بھائی ایہو وقت کماون دا
یوں ستاراں پیندے نیں، ہن داء نہ بازی ہارن دا
اجڑی کھیڈ چھین گیاں نرداں جھاڑ دکان اٹھاویں گا
حجاب کریں درویشی کد تک حکم چلاویں گا
کھاویں ماس چباویں بیڑے انگ پوشاک لگائی اے
ٹیڈھی پگڑی آکڑ چلیں جتی پیر اڑائی اے
پلدا ہیں توں جم دا بکر اپنا آپ کوہاویں گا
حجاب کریں درویشی کولوں کد تک حکم چلاویں گا
پل دا واسا وسن ایتھے رہن نوں اگے ڈیرا ہے
لے لے تحفے گھر نوں گھلیں ایہو ویلا تیرا ہے
اوتھے ہتھ نہ لگدا کجھ وی، ایتھوں ای لے جاویں گا
حجاب کریں درویشی کولوں کد تک حکم چلاویں گا
پڑھ سبق محبت اوسے دا توں بے موجب کیوں ڈبناں ایں
پڑھ پڑھ قصے مغزکھپاویں کیوں کھبھن وچ کھبناں ایں
حرف عشق دا اکو نکتہ کاں کو اٹھ لداویں گا
حجاب کریں درویشی کولوں کد تک حکم چلاویں گا
اماں، بابا، بیٹی ، بیٹا، پچھ ویکھاں کیوں روندے نی
رناں، کنجکاں، بھیناں، بھائی، وارث آن کھلوندے نی
ایہہ جو لٹدے توں نہیں لٹدا مر کے آپ لٹاویں گا
حجاب کریں درویشی کولوں کد تک حکم چلاویں گا
اکلیاں ایتھوں جاناہے تے کوئی سنگ نہ جاویں گا
خویش قبیلہ روندا پٹدا راہوں ہی مڑ آویں گا
شہروں باہر جنگل وچ واسا اوتھے ڈیرا پاویں گا
حجاب کریں درویشی کولوں کدتک حکم چلاویں گا
کراں نصحیت وڈی جے کوئی سن کر دل تے لاویں گا
موئے تاں روز حشر نوں اٹھن عاشق نہ مرجاویں گا
جے توں مریں مرن توں اگے مرنے دا مل پاویں گا
حجاب کریں درویشی کولوں کدتک حکم چلاویں گا
راہ شرع جاں پگڑیں گاتاں اوٹ محمدی ہووے گی
کہندی ہے پرکردی ناہیں ایہو خلقت رووے گی
ہن ستیاں تینوں کون جگائے جاگدیاں پچھتاویں گا
حجاب کریں درویشی کولوں کد تک حکم چلاویں گا
جے توں ساڈے آکھے لگیں تینوں تخت بہاویں گے
جس نوں سارا عالم ڈھونڈے تینوں آن ملاویں گے
زہدی ہو کے زہد کماویں لے پیا گل لاویں گا
حجاب کریں درویشی کولوں کد تک حکم چلاویں گا
اینویں عمر گوائی آ اوگت عقبت چا رڑھائی اے
لالچ کرکر دنیا اتے مکھ سفیدی آئی اے
اجے وی سن جے تائب ہوویں تاں اشنا سداویں گا
حجاب کریں درویشی کولوں کدتک حکم چلاویں گا
بلھا شوہ دے چلنا ایں تاں چل کیہا چر لایا ہے
جکو دھکے کیہہ کرنے جاں وطنوں دفتر آیا ہے
واچدیاں خط عقیل گیو ای، رو روحال ونجاویں گا
حجاب کریں درویشی کولوں کد تک حکم چلاویں گا
بابا بلھے شاہ
No comments:
Post a Comment
Note: only a member of this blog may post a comment.