پِیلے پَتَّر ہو جاندے نے
دِل وی بنجر ہو جاندے نے
دُنیا داری دے مارے تاں
پُھل وی پتھر ہو جاندے نے
مندے حالاں وِچ غیراں توں
اپنے بدتر ہو جاندے نے
وقت دی گرمی لگ جاوے تاں
شہ وی کمتر ہو جاندے نے
میرے سب سُفنے ہی اکثر
تِتّر بِتّر ہو جاندے نے
اپنے عمل ای اکثر مینوں
چُکنے دوبھر ہو جاندے نے
نیناں دی نہ گل کر شوزب
ایویں خنجر ہو جاندے نے
شوزب حکیم
No comments:
Post a Comment
Note: only a member of this blog may post a comment.