جدید پنجابی شاعری
کیتا سی کدی پیار بڑی دیر دی گل اے
دو اکھیاں سن چار بڑی دیر دی گل اے
آیا سی بہاراں تے کدی باغ جوانی
کھڑیا سی ایہہ گلزار بڑی دیر دی گل اے
بجلی دی نری لشک سی اک اکھ دی شوخی
اک نظر سی تلوار بڑی دیر دی گل اے
اک لشکدی تحریر سیاہ بخت میرے دی
سرمے دی سی اک دھار بڑی دیر دی گل اے
منصور دے دل وانگ میرے دل دا سی جگرا
اک پلک سی اک دار بڑی دیر دی گل اے
اج دسدی اے خالی پر ایہہ اوہو ای اے گردن
اک بانہہ سی جہدا ہار بڑی دیر دی گل اے
شاماں توں فجر تیکراں رہندا سی وچ اکھاں
اک چن دا پروار بڑی دیر دی گل اے
قید اوہدیاں نظراں تے جے ہے سی نہ کسے دی
دل میرا سی مختار بڑی دیر دی گل اے
اج اوہدیاں واٹاں تے نیں پے سہکدے دیدے
شوخ حسن دا بلکار بڑی دیر دی گل اے
رونے نیں ایہدے اج نرے درد دے رونے
ہندا سی ایہہ سنسار بڑی دیر دی گل اے
بدنام جدوں ہوئے ساں دوویں اسیں کٹھے
ایہہ گل تے سرکار بڑی دیر دی گل اے
تھاں تھاں نیں فقیر اج میرغ فقر دے چرچے
ہے ساں میں گنہ گار بڑی دیر دی گل اے
ڈاکٹر فقیر محمد فقیر
No comments:
Post a Comment
Note: only a member of this blog may post a comment.