جدید پنجابی شاعری
چن اے عجیب لشکدے تارے عجیب نیں
فرقت دی رات دے ایہہ سہارے عجیب نیں
چانن ہنیریاں دے گزارے عجیب نیں
لشکے کسے دی زلف دے تارے عجیب نیں
باگے شبہ خزاں دا پے پاندے نیں پھل اجے
ڈٹھے تیری وی رنگ بہارے عجیب نیں
دس دی اے آس نال پئی تقدیر وگڑدی
گیسو کسے نے اج سوارے عجیب نیں
دل دے کے کھیڈیا اساں جواء اے پیار دا
جت دے کے کیوں نہ داء اسیں ہارے عجیب نیں
جادو حیا دے رہن نہ دتا اے یاد کجھ
کیتے کسے دی اکھ اشارے عجیب نیں
کجھ گھٹ اے دکھ ساڈے وی پاگل پنے دا ویکھ
تیرے سنگار دے جے نظارے عجیب نیں
دسدا اے کوئی مہر کوئی آوے نظر کرم
تیرے ستم ستمگرا! سارے عجیب نیں
رکھدے نیں کجھ نہ رکھ کے شاہواں دے حوصلے
ہندے فقیر وی ایہہ وچارے عجیب نیں
ڈاکٹر فقیر محمد فقیر
No comments:
Post a Comment
Note: only a member of this blog may post a comment.