عارفانہ کلام حمد نعت منقبت سلام
جنگ نامہ
ہن بدلہ لین حسینؑ دا آئے چڑھ بھرا
شہید امام حسینؑ دا اندر اونہاں دے کھاہ
دوہیں ولیں مقابلہ آ دھونسے لگی سٹ
نیزے لین بھنوالیاں جیویں سولی چڑھدے نٹ
مارن تیغاں سُورمے فوجاں پیئیاں دھاء
طالب محمد حنفیہ رل گئے دوویں بھرا
مارن تیغاں سُورمے کر دیون دو کٹ
بھڑدے آہموں ساہمنے کوئی نہ کردا گھٹ
ہاتھی اُتے ہاتھی مار کے اوہ دیون کر فنائی
نعرہ کر کے حیدریؑ دتی فوج بھنوائی
کہے محمد حنفیہ بھائیاں ہُن رو رو
مینوں ہے جے درد حسینؑ دا دل وچ ڈاہڈا سو
کجھ کرائیو میتھوں بھی تسیں کہو اگیرے ہو
فوجاں ہُن دمشقوں دتیاں نیڑے ڈھو
چڑھیا محمد حنفیہ دھرگاں نوں دھروان
خبراں ہوئیاں دمشق وچ نیڑے لتھے آن
ڈیرے کیتے غازیاں دتے لا نشان
دھرتی تھر تھر کنبدی کنبن پئے جوان
ہوش نہ رہی یزید نوں کنبیا بے ایمان
رہندے بیٹے علیؑ دے سولاں اوہ سردار
اوہ بادشاہ ہین ملک دے وڈے منصبدار
نہ ہوئی خبر حنیف نوں کُوک پئی دربار
امام حسینؑ شہزادہ خارجیاں گھتیا مار
پگڑی ماری دھرت تے جامے سٹے پاڑ
چڑہتل کیتی غازیاں ہویا شاہ تیار
ہن طرف بھرا نوں لکھدا شاہ حنفیہ رو
لُٹیا گھر رسولؐ دا ہر کوئی کرئیو سو
بدلہ لیئو حسینؑ دا لشکر دیئو ڈھو
راہو راہی آوندے اللہ کرے سو ہو
وچ ہن عرب عراق دے ڈیرے لتھے آ
ایہ بیٹا حضرت علیؑ دا حنفیہ شیر خدا
جہناں نوں درد حسینؑ دا اوہ مومن ملدے آ
زارو زاری رووندے جیندے مرن بھرا
وچ مدینے ہل چل پئے گیا وڈا شور
آیا شاہ حنیف ہے کر کے وڈا زور
اگے پاک رسولؐ دے کرے حنیف سوال
ہتھ ناں میرا نال ہے جنگ کراں کس نال
آکھے شاہ حنیف نوں علی شیر خداؑ
جا کے وچ میدان دے توں پنجہ ڈھونڈ لیا
آکھے شاہ علیؑ نوں شاہ حنیفہ فیر
مینوں نہیں اوہ لبھدا اوتھے مُردے ڈھیر
تاں پنجہ آندا ڈھونڈ کے شاہ علیؑ شیر خدا
نال ہن بانہہ دے جوڑ کے منگی اس دعا
برکت پاک رسولؑ دی ہو گئی بانہہ شفاء
شاہ حنیف ہن اُٹھیا خوابوں ہو بیدار
صحیح سلامت ڈٹھو سو پنجہ ہتھ دے نال
راضی ہویا رب تے کردا شکر ہزار
تاں ماری فوج یزید دی چُھٹ حنیف جوان
پنجہ ثابت ہو گیا سنیاں کل جہان
کنبن سارے خارجی خوش ہوون مسلمان
آیا محمد حنفیہ چڑھیا نغارے مار
رنگ برنگے آدمی کراں میں کیہ شمار
کلے کمید تے کاہلرے ہور نقرے کئی ہزار
مشکی اتے سمند بھی اوہ سوہنے کرن ہنکار
فوجاں رنگ برنگیاں چڑھ آئے اسوار
چڑھیا محمد حنفیہ ہوئی سی مارو مار
مدینے تے دمشق دے آن لتھے وچکار
ڈیرے کیتے غازیاں لہے پئے اسوار
جد نعرہ کردے حیدریؑ دیندے دھرتی پاڑ
اوہ چڑھے دمشقوں خارجی ہوئی اکٹھی شام
اوہ دشمن آل رسول دے منکر بے ایمان
دھرت کنبائی گھوڑیاں ہاتھی ہونڈ ہلان
اوہ اگا لین حنیف دا آن بدھو نے لام
دوہیں ولیں مقابلہ لگے آن نشان
بیٹے حضرت علیؑ دے لتھے آن پہلوان
لشکر اہموں ساہمنے بن کھلا میدان
وجن نقارے شتریاں گھوکر گھتن بان
سانگاں لین بھنوالیاں جھٹن تیر کمان
تیغاں ہوون او تاولیاں نہ اٹکن وچ میان
جوش کریندے سورمے کنبن پئے جوان
دھرت ہلائی گھوڑیاں اڈ گرد چڑے آسمان
تاں محمد حنفیہ آکھے نال زبان
چن چن مارو خارجی اک نہ دیہو جان
لشکر دے وچ دھا پئے طالب تے خاقان
بیٹے حضرت علیؑ اوہ وڈے پہلوان
مارن تیغاں غازیئے ہوئی وڈی قتلام
چڑھ نارد کل کھلاریا آیا وڈا طوفان
اوہ لشکر اونہاں ماریا رہی نہ جان پچھان
نالے وگے رت دے ستھر پئے جوان
کیتا جنگ ہن غازیاں لائیا وڈا تران
مردے آہموں ساہمنے پئے ہن وچ میدان
جیویں اونہاں مارے آہے کربل وچ امام
فقیر میاں رحمت
No comments:
Post a Comment
Note: only a member of this blog may post a comment.