جدید پنجابی شاعری
سانوں بُھکھ شکار وکھا گئی ساڈے کنبدے ہتھ غلیل
جد پکھوآں کھب کھلارے تے اودوں آئی موت تریل
ساڈے وَن سَوَّنے تِھگڑے پر دِسدا اندروں ننگ
ساڈی اے سِنجھاپ بنا نئیں ساڈا اندر باہر میل
اے پِٹھو کنج ناں جاپدے جیویں کتے سٹدے جھگ
جنہوں مالک جان کے وگدے اوہدا ہڈی پاون کھیل
سانوں ایڈا سستا تول نئیں کیتا ماہگا بہوں وپار
دِتی ماں دیاں ٹُوماں ویچ کے تیرے حسن دی سجنا ویل
جیہڑا اگ نوں چانن جاندا تے کالک جانڑے نور
پُوجھ اوس مزدور دا مُڑھکا جیہڑا لہو دا ساڑے تیل
ایس قیدن نوں وَدھ روٹی دے اے دُدھ پلاندی ماں
اے بچہ ہے ازاد جی ایہدی ماں اے ڈکی جیل
ایہدی سیٹی سَدّا چوراں دا ایہدا اُکوں لُگّا راہ
ہُن کنج جا ٹیشن چڑھسی اے لین تَھڑُّکی ریل
پہلاں کِھلری آل دوال نوں فیر انبر کِیتا منہ
ہُن رُکھ نوں جا کے چمڑی اے سَوکا پاندی ویل
غدیر زہرا
غدیر زہرہ
No comments:
Post a Comment
Note: only a member of this blog may post a comment.