پنجابی عارفانہ کلام، حمد نعت، منقبت، سلام، مرثیہ
لایا مہندی خون اجل دی اے
ایہہ مہندی روز ازل دی اے
ایہہ مہندی فاطمہؑ سَین دی اے
خونِ پاک شہید حسینؑ دی اے
ایہہ ہوراں نال نہ رلدی اے
لایا مہندی خون اجل دی اے
نبیﷺ علیؑ دا در یگانہ
فاطمہؑ مائی دا مال خزانہ
نانا پاکﷺ دا پہن کے بانا
طرف مقتل دے تھیا روانہ
جنبش ہوئی زمین آسماناں
نالے عرش عظیم پئی ہلدی اے
لایا مہندی خون اجل دی اے
آکھے نبیؐ تے علیؑ فاطمہؑ زہراؑ
فرزند حسینؑ تو ویہلا آیا
سانوں سِک تیری پل پل دی اے
لایا مہندی خون اجل دی اے
شاہؑ تیری مہندی دا پتر ساوا
کُوفیاں رل مل کیتا دھاوا
اینوں لکھی ہوئی روز ازل دی اے
لایا مہندی خون اجل دی اے
شاہ تینڈی مہندی دا پتر پیلا
سونپیوئی رب نو خوشی قبیلہ
تینوں پئی مصیبت کربل دی اے
لایا مہندی خون اجل دی اے
شاہ تینڈی مہندی دا رنگ دلارا
روندا تینوں عالم سارا
ساری خلقت تلیاں ملدی اے
لایا مہندی خون اجل دی اے
شاہ تینڈی مہندی دا رنگ سُوہا
اُمت نوں ہے تیرا بُوہا
ساری اُمت جلدی بلدی اے
لایا مہندی خون اجل دی اے
ایہہ مہندی سوہنے باگ دی اے
و یطھر کم والی لاگ دی اے
تاہیں ہوراں نال نہ رلدی اے
لایا مہندی خون اجل دی اے
ادھر پاک معصوم پیاسے ترسن
جنہاں تے مینہ تیراں دے برسن
ادھر تیغ حسینؑ تے چلدی اے
لایا مہندی خون اجل دی اے
رب نوں آہا ایہو بھانڑاں
رتبہ شہیدی تینوں دوانڑوں
نہیں تاں تھوڑ اتھے کیہڑی گل دی اے
لایا مہندی خون اجل دی اے
سبحان اللہ تیرے رنگ الٰہی
اوہ سوہنی صورت فاطمہ جائی
اج خاک وچ پئی رلدی اے
لایا مہندی خون اجل دی اے
مہر علی شاہ ایہہ جھوک فنا دی
دائم قائم ذات خدا دی
تیری وسدی وی پل جھل دی اے
لایا مہندی خون اجل دی اے
پیر مہر علی شاہ
No comments:
Post a Comment
Note: only a member of this blog may post a comment.