جدید پنجابی شاعری
کیتی درد اخیر وے سائیں
تن من لیر و لیر وے سائیں
وچ کربل پئے وَین نیں پاندے
نیزے، برچھے، تیر وے سائیں
ادھی راتی شور مچاندی
ہاواں دی زنجیر وے سائیں
من چولے دے سوت نوں رنگ کے
کر دے سبز حریر وے سائیں
ڈاڈی میل تے صابن تھوڑا
کی ہووے تدبیر وے سائیں
ہجر عذاباں سہندی ویکھی
عشقے دی تقدیر وے سائیں
من مندر جے ڈھے جاوے تے
اوکھی اے تعمیر وے سائیں
یار سوا ہُن لبھناں کُجھ نئیں
لے خنجر دل چیر وے سائیں
اِذن بنا تے مِٹ نئیں سکدی
متھے دی تحریر وے سائیں
نفس مُرید وی ہو جاندا اے
من جے ہووے پِیر وے سائیں
رانجھن رانجھن وِرد پکا کے
رانجھن ہوئی ہیر وے سائیں
محرم کہہ کے رہندا اولے
ڈاہڈی آں دِلگیر وے سائیں
بھر دے اِنج تُو کاسہ من دا
آکھن لوک فقیر وے سائیں
ہنجو، ہاڑے، تانگ مِلن دی
ساڈی کُل جاگیر وے سائیں
آتش من دی لُوں لُوں ساڑے
عشق دی اے تاثیر وے سائیں
نیناں دے اچ آ کے وجدی
نیناں دی شمشیر وے سائیں
پاک درودﷺ دی تسبیح پڑھدے
اکھیاں دے اے نِیر وے سائیں
ہتھ صبا دے کورے ورقے
لِکھ دے مِلن لکیر وے سائیں
صبا نذیر
No comments:
Post a Comment
Note: only a member of this blog may post a comment.