کلاسیکی پنجابی شاعری
ڈھلک گئی چرخے دی ہتھی، کتیا مول نہ جاوے
تکلے نوں ول پے پے جاندے، کون لوہار سداوے
تکلے دے ول کڈھ لوہارا، تندی ٹٹ ٹٹ جاوے
گھڑی گھڑی ایہہ جھولے کھاندا، چھلی کت بدھ لاہوے
فیتا نہیں جو بیڑی سجناں، بایڑ ہتھ نہ آوے
چمڑیاں اُتے چوپڑ ناہیں، ماہل پئی بڑلاوے
ڈھلک گئی چرخے دی ہتھی، کتیا مول نہ جاوے
تکلے نوں ول پے پے جاندے، کون لوہار سداوے
دن چڑھیا کد گزرے مینوں، پیارا مُکھ دکھلاوے
جت ول یار اُتے ول اکھیں، دل میرا بیلے دھاوے
تنجن کتن، سدن سیاں، برہوں ڈھول وجاوے
عرض ایہو مینوں آن ملے ہن، کوئی وسیلہ چاوے
سے مناں دا کت لیا بلھا، مینوں شوہ گل لاوے
دن چڑھیا کد گزرے، مینوں پیارا مُکھ دکھلاوے
ڈھلک گئی چرخے دی ہتھی، کتیا مول نہ جاوے
تکلے نوں ول پے پے جاندے، کون لوہار سداوے
بابا بلھے شاہ
کہیں کہیں مطلع یوں بھی ملتا ہے؛
ہتھی ڈھلک گئی میرے چرغے دی میتھوں کتیا مول نہ جاوے
No comments:
Post a Comment
Note: only a member of this blog may post a comment.