جدید پنجابی شاعری
او اک ایسا جادوگر سی
قابو کر کے جس نُوں چاہندا
بوتل دے وِچ بند کر لیندا
میں ساں وگدا کھارا پانی
مینوں اپنی بُک وِچ پا کے
مِٹھا کرن دا لارا لا کے
اپنی بوتل بھر بیٹھا سی
مینوں قابو کر بیٹھا سی
بوتل وِچ اُبالے کھاندی
روز ندی دے خواب سجاندی
گالاں کڈ دی دندیاں وڈدی
ہر پل روندی تے کُرلاندی
اک دن سپنے نُوں کھمب لا کے
اپنے آپ نُوں بھاپ بنا کے
جادوگر تُوں جان چھڈا کے
میں امبراں تُوں کُھل کے وسی
لہراں بن کے کِھڑ کِھڑ ہسی
ایسا کوئی نئیں جادو آیا
پانی کس دے قابو آیا؟
اقصٰی گیلانی
No comments:
Post a Comment
Note: only a member of this blog may post a comment.