جدید پنجابی سرائیکی شاعری
ہلاں دے وانگ ہسدِن، کلیاں دا ہار ہوندن
کُجھ لوک شہر دے وچ موسم دی کار ہوندن
کُونجھاں دی کُوک وچ ہن، ہانواں دی ہُوک وچ ہن
مُکھڑے ملُوک وچ ہن، ہانھ دی پُکار ہوندن
کُجھ لوک شہر دے وچ موسم دی کار ہوندن
بُک بُک دعا ونڈیندن، چُپ اچ الا ونڈیندن
حبس اچ ہوا ونڈیندن، وسدی پُھوار ہوندن
کُجھ لوک شہر دے وچ موسم دی کار ہوندن
سج نال دھج گُلیندن، بُکھیاں دا رج گُلیندن
ننگیاں دا کج گُلیندن، یاراں دے یار ہوندن
کُجھ لوک شہر دے وچ موسم دی کار ہوندن
خوشبو ونڈیندے رہندن پتجھڑ دے موسماں وچ
جہڑی نہ مُک سکے کُئی اے جئی بہار ہوندن
کُجھ لوک شہر دے وچ موسم دی کار ہوندن
ساہ دی زنجیر جینویں، ہتھ دی لکیر جینویں
اینویں ظہیر جینویں روح دا قرار ہوندن
کُجھ لوک شہر دے وچ موسم دی کار ہوندن
ظہیر مہاروی
No comments:
Post a Comment
Note: only a member of this blog may post a comment.