جدید پنجابی شاعری
سُورج ساڈے دُکھ ونڈاوے بدّل دین دلاسے
چن تے تارے مشری ونڈن واواں کھنڈ پتاسے
اِک دُوجے دے دن تے راتاں توڑن نہ بھرواسے
خُشیاں رج دھمالاں پاون ویکھاں جہڑے پاسے
رب کرے ہر سال اساڈے دیس چ کھیڈن ہاسے
نہ کِسے نوں دُھپاں ڈنگن نہ کِسے نوں پالے
ذہناں اُتوں لہہ لُو جاون خُود غرضی دے جالے
اپنی موتے مردے ویکھاں وَیر دے پھنیر کالے
سچا مالک آون والی ہر بلا نُوں ٹالے
رب کرے ہر سال اساڈے ہوون دن سُکھالے
پنچھی سُکھ دے سازاں اُتے گاون گیت سُریلے
سُولاں دے نک پین نکیلاں کنڈے جاون کِیلے
کُجھ وی ہووے پر نہ ہوون پُھلاں دے رنگ پیلے
ہنجھواں وچ نہ بِھجن شالا سُندر نین نشیلے
رب کرے ہر سال اساڈے موسم ہون رنگیلے
رل کے سارے آپو اپنے پورے فرض نبھاون
کوئی کِسے دا حق نہ مارے سارے رجویں کھاون
نچّن ٹپّن موجاں مانن ساہ ساہ سُکھ ہنڈاون
سجناں وانگوں سبھ سجناں نوں ہس کے سینے لاون
رب کرے ہر سال اساڈے دُکھ نہ نیڑے آون
رِیجھاں چاہواں لُڈیاں پاون آوے اِنج خُشحالی
سینے دے وِچ ٹھنڈاں پاوے کھیتاں دی ہریالی
رہین سلامت انب دھریکاں پِپل بوڑھ تے ٹالھی
ہر اِک مُکھ تے ڈلھکاں مارے سندھو سُکھ دی لالی
رب کرے ہر سال اساڈے چنگے ہوون مالی
ارشاد سندھو
No comments:
Post a Comment
Note: only a member of this blog may post a comment.